အစားလျှော့စားတိုင်း ဝိတ်ကျမယ်ဆိုတာ သေချာလား
ဝိတ်ကျချင်တယ်၊ Diet လုပ်တော့မယ်ဟေ့လို့ တွေးပြီဆိုရင် ပျိုပျိုမေမေတွေ အရင်ဆုံးလုပ်တတ်တာကတော့ အစားလျှော့စားတာပါ။ အချို့သော အစားအစာ၊ အာဟာရဓာတ်တွေ လျှော့စားခြင်းက ကိုယ်အလေးချိန်လျှော့ချရမှာ အကူအညီဖြစ်တယ်ဆိုပေမယ့် ကိုယ့်ရဲ့ Diet Plan က စနစ်တကျစီစဉ်ထားတာမရှိဘဲ စိတ်ထင်သလိုပဲ လုပ်နေရင်တော့ မှန်းချက်နဲ့ နှမ်းထွက်မကိုက်ဘဲ ဖြစ်ပါလိမ့်မယ်။
ကိုယ်အလေးချိန် လျှော့ဖို့အတွက်တင်မကပါဘူး၊ ပိန်ညှက်နေတဲ့သူတွေ ပြည့်ပြည့်ဖြိုးဖြိုး ဖြစ်လာဖို့အတွက် အစားအစာက ၇၀% အရေးကြီးပါတယ်။ ကျန်းမာရေးနဲ့ ညီညွတ်အောင် စားသုံးဖို့၊ အစာအာဟာရ စုံလင်စွာ စားသုံးဖို့နဲ့ ကိုယ့်အတွက် အားဖြစ်စေပြီး အဆီနည်းစေမယ့် အစားအစာတွေကို ပိုစားပေးဖို့က အဓိကကျပါတယ်။
ဝိတ်ကျချင်တဲ့သူတွေအတွက် ဘာတွေကို အဓိကစားပေးရမလဲဆိုရင်
- အားရှိပြီး ဗိုက်ပြည့်စေဖို့ ကြက်ဥပြုတ်
- အာဟာရဓာတ်ကြွယ်ဝတဲ့ အစိမ်းရင့်ရောင် ဟင်းသီးဟင်းရွက်များ
- ပရိုတင်းဓာတ်အတွက် အသား (ကြက်သား၊ ငါးကို ပိုစားပေးပါ)
- ကစီဓာတ်များတဲ့ အာလူး၊ ကန်စွန်းဥ
- ပရိုတင်းဓာတ်အတွက် အသားအစားထိုး ပဲအမျိုးမျိုး
- ကျန်းမာတဲ့ အဆီဓာတ်အတွက် ထောပတ်သီး၊ သံလွင်ဆီ
- အခွံမာသီး၊ အစေ့အဆံများ
- ဂျုံကြမ်းပေါင်မုန့်များ၊ ကွေကာအုပ်မုန့်ကြွပ်၊ ဆန်လုံးညို
- အသီးအနှံများ
- ဒိန်ချဉ်တွေကို စားပေးပါ။
ဝိတ်ကျချင်သူတိုင်း ကိုယ့်ရဲ့ Diet Plan ကို စီစဉ်တဲ့အခါ
၁။ မနက်စာကို အလွတ်မခံပါနဲ့။ မနက်စာဟာ လူတစ်ယောက်ရဲ့ တစ်နေ့တာမှာ လိုအပ်တဲ့ အားအင်တွေကို အများဆုံးပေးနိုင်သလို ဗိုက်ကိုလည်း ပိုပြည့်စေပြီး အဆာခံစေဖို့ ကူညီပေးနိုင်ပါတယ်။ မနက်စာ၊ နေ့လယ်စာ၊ ညနေစာ အနည်းဆုံး ၃ ကြိမ်ခွဲစားပါ။
၂။ ပမာဏနည်းနည်းနဲ့ အကြိမ်ရေများများ စားခြင်းဟာ ခန္ဓာကိုယ်ထဲ မလိုအပ်ဘဲ အာဟာရဓာတ်တွေ၊ အဆီတွေ၊ အစားအစာတွေ ရောက်သွားပြီး အလဟဿမဖြစ်စေအောင် ကူညီပေးနိုင်ပါတယ်။ ဒါကြောင့် အစာအိမ်က ချေဖျက်နိုင်သလောက် ပမာဏနည်းနည်းနဲ့ အချိန်ကို ၂-၃ နာရီကြား စားပေးပါ။ အကယ်လို့ ကိုယ်က ထမင်းကို ၃ နပ်ပဲ မဖြစ်မနေစားမှဖြစ်မယ်ဆိုရင် တစ်နပ်နဲ့ တစ်နပ်ကြားမှာ အဆာခံပြီး အာဟာရဖြစ်မယ့် အသီးအနှံ၊ ဒိန်ချဉ်၊ ကြက်ဥပြုတ်၊ ဂျုံကြမ်းပေါင်မုန့်၊ အသားပြုတ်၊ သစ်သီးဖျော်ရည် စတာတွေကို စားပေးနိုင်ပါတယ်။
၃။ Diet Plan တစ်ခုမစတင်ခင် ကိုယ်ပြနေကျ ဆရာဝန်နဲ့ အရင်တိုင်ပင်ပါ။ လိုအပ်မှ Diet Plan ချပါ။ အစားအသောက်ကို သေချာဆင်ခြင်ပြီး စားသုံးမယ်၊ Gym လည်း သေချာကစားတယ်ဆိုရင် အရမ်းတင်းကြပ်ပြီး ဟိုဟာမစားရ၊ ဒီဟာမစားရနဲ့ ကိုယ့်စိတ်ကို ညှင်းဆဲရာလည်း မရောက်တော့ပါဘူး။ တစ်ခါတလေ စားလိုက်တာက ပြဿနာမဟုတ်ပါဘူး။ အလွန်အကျွံမစားဖို့နဲ့ အမြဲမစားဖို့ကို ထိန်းရမှာကသာ ကိုယ့်တာဝန်ပါ။
၄။ အစားအစာတစ်ခုတည်း ထိန်းရင် ၇၀% ထိရောက်မှုရှိမှာဖြစ်ပြီး ကျန်တဲ့ ၃၀% ကိုတော့ လေ့ကျင့်ခန်း နဲ့ ထိန်းထားဖို့ လိုအပ်ပါတယ်။ လေ့ကျင့်ခန်းလုပ်ခြင်းက ကိုယ်အလေးချိန်ချဖို့ အကောင်းဆုံးနည်းလမ်းတစ်ခုဖြစ်ပြီး Gym ကို အချိန်ပေးမကစားနိုင်ဘူးဆိုရင်တောင် လမ်းလျှောက်တာ၊ ပြေးတာ၊ စက်ဘီးစီးတာ၊ လှေကားအတက်အဆင်းလုပ်ပေးတဲ့ လေ့ကျင့်ခန်းတွေ လုပ်ပေးလို့ရပါတယ်။
၅။ အိပ်ချိန်မှန်အောင် ဂရုစိုက်ပါ။ တစ်ရက်ကို ညအိပ်ချိန် ၇ နာရီအနည်းဆုံးရှိခြင်းက လူ့ခန္ဓာကိုယ်ရဲ့ ဇီဝကမ္မဖြစ်စဉ်ကို လျင်မြန်စွာဖြစ်ပျက်ပြောင်းလဲစေလို့ ခန္ဓာကိုယ်ရဲ့ ကယ်လိုရီလောင်ကျွမ်းနှုန်းကို မြှင့်တင်ပေးနိုင်မှာပါ။ အိပ်ချိန်နဲ့ အလွန်နီးကပ်ပြီး အစာစားတာ၊ ညနောက်ကျမှအိပ်ပြီး အစာစားတဲ့အကျင့်ကိုလည်း လုံးဝဖျောက်ပါ။
အစားတွေကို ထိန်းပါလျက်နဲ့ ကိုယ်လိုချင်သလောက် ကိုယ်အလေးချိန်မကျလာတဲ့အခါ စိတ်ဓာတ်မကျဘဲ လက်ရှိအတိုင်း ကျန်းမာရေးနဲ့ ညီညွတ်အောင် ဆက်စားပေးဖို့ သေချာဂရုစိုက်ပေးပါ။ လူ့ခန္ဓာကိုယ်ဖွဲ့စည်းပုံဟာ တစ်ယောက်နဲ့တစ်ယောက် မတူညီတာကြောင့် ကယ်လိုရီလောင်ကျွမ်းနှုန်းဟာလည်း မတူပါဘူး။
ဒီတော့ တူညီတဲ့ Diet Plan တစ်ခုတည်းမှာတောင် တခြားသူက ၁၀ ပေါင်ကျလို့ ကိုယ်က ၅ ပေါင်တည်းကျရင် စိတ်ဓာတ်မကျပါနဲ့။ ကိုယ်စားသောက်နေတဲ့အရာတွေ၊ ကိုယ့်နေထိုင်ပုံတွေကို သေချာပြန်ဆန်းစစ်ပါ။ မှားယွင်းနေတာမရှိဘူးဆိုရင် ဒီအတိုင်းပဲ ဆက်သွားပါ။
ခန္ဓာကိုယ်ကို ကျန်းမာရေးနဲ့ ညီညွတ်အောင် ထိန်းသိမ်းဖို့ဆိုတာ ချက်ချင်းလက်ငင်း ဖြစ်လာတဲ့အရာမဟုတ်ပါဘူး။ အချိန်ကြာကြာ စိတ်ရှည်သည်းခံပြီး ပြုပြင်ဖန်တီးရတဲ့ အရာဖြစ်တာကြောင့် ကိုယ့်အတွက် ကောင်းတဲ့အရာမှန်းသိရင် အားတင်းထားပြီး ဆက်လုပ်ပေးစေချင်ပါတယ်။
ရေးသားသူ - ရဲမျိုးမြတ်