ကျန်းမာရေးနဲ့ ညီညွတ်တဲ့ ဟင်းချက်ဆီ ဆိုတာ
ဟင်းချက်ဆီ နေ့စဉ်စားသုံးမှုမှာ ပုံစံအမျိုးမျိုးနဲ့ ပါဝင်နေပါတယ်။ ဆီကို အိနေမှ စားတတ်တဲ့သူတွေရှိသလို ဆီးကို ပါလေရာပဲ ထည့်စားတယ်ဆိုတဲ့ သူတွေလည်း ရှိပါတယ်။ ဘယ်လိုပဲ စားစား ဟင်းချက်ဆီကို စားဖြစ်တာပါပဲ။
ဟင်းချက်ဆီ ဆိုတဲ့နေရာမှာ ပဲဆီ၊ နှမ်းဆီ၊ ပဲပိစပ်ဆီ၊ နေကြာဆီ၊ သံလွင်ဆီ၊ ဟင်းသီးဟင်းရွက်ဆီ နဲ့ စားအုန်းဆီဆိုပြီး အမျိုးမျိုး ကွဲပြားနေပါတယ်။ ဒါပေမယ့် ဆီတွေထဲမှာ စားအုန်းဆီကတော့ ကျန်းမာရေးနဲ့ မညီညွတ်ဘူးလို့ အများက လက်ခံယူဆထားကြပါတယ်။
နေ့စဉ်စားသုံးမှုမှာ အနည်းအများ ပမာဏ ကွာခြားနေပေမယ့် မပါမဖြစ် ပါဝင်နေတဲ့ ဆီကို ကျန်းမာရေး မထိခိုက်စေဖို့ ဘယ်လိုအချက်အလက်တွေကို ကြည့်ပြီး ရွေးချယ်ရမလဲဆိုတာ အတူတူကြည့်လိုက်စို့နော်။
ဆီတိုင်းမှာ အဆီဓာတ်တွေ ပါဝင်နေပါတယ်
ဟင်းချက်ဆီတိုင်းမှာ အဆီဓာတ်က ရာနှုန်းပြည့် ပါဝင်နေတာပါ။ ဒီလို ရာနှုန်းပြည့် ပါဝင်နေတဲ့ အဆီတွေထဲမှာ ကောင်းတဲ့အဆီရယ် မကောင်းတဲ့အဆီရယ်ဆိုပြီး ရှိပါတယ်။
ကောင်းတဲ့အဆီ ဆိုတာက သွေးထဲမှာ မကောင်းတဲ့အဆီဓာတ်တွေကို လျှော့ချပေးတဲ့ monounsaturated fat နဲ့ polyunsaturated fat တို့ကို ခေါ်တာပါ။
မကောင်းတဲ့ အဆီဆိုတာကတော့ အသွင်ပြောင်းဆီ နဲ့ ပြည့်ဝဆီလိုမျိုး သွေးတွင်းမှာ မကောင်းတဲ့ အဆီတွေကို တိုးစေနိုင်တဲ့ အဆီတွေကို ဆိုလိုတာပါ။
ကျန်းမာရေးနဲ့ ညီညွတ်တဲ့ ဟင်းချက်ဆီ ရွေးချယ်မယ်
အကြမ်းဖျင်း ရှင်းပြရရင် ဟင်းချက်ဆီ ရွေးတဲ့အခါ ကျန်းမာရေးနဲ့ ညီညွတ်စေဖို့ဆိုရင် ပြည့်ဝဆီ 35 % ထက် မကျော်ဘဲ အသွင်ပြောင်းအဆီ 0.5% ထက် ပါဝင်မှုနည်းပြီး မပြည့်ဝဆီ 50%ပါတာမျိုးကို ရွေးချယ်ရပါမယ်။
မြင်သာအောင် ပြောရရင် ဆီကို အအေးခံလိုက်လို့ ဖြစ်ဖြစ် ပတ်ဝန်းကျင်မှာ အအေးပိုနေချိန်မှာ ဖြစ်ဖြစ် ခဲသွားတဲ့ ဆီမျိုးကို မရွေးရပါဘူး။ ဒီအဆီတွေထဲမှာ ပြည့်ဝဆီ ပါဝင်နေတာကြောင့် နှလုံးသွေးကြောကျဉ်းတာ၊ လေဖြတ်တာလိုမျိုး ကျန်းမာရေး ပြဿနာတွေကို ဖြစ်စေနိုင်လို့ပါ။
ဆီက အပူပေးလိုက်ချိန်မှာ အရမ်းအငွေ့ပျံလွန်းမယ်။ အနံ့က စူးစူးပြင်းပြင်း ဖြစ်နေမယ်ဆိုရင်လည်း စားသုံးဖို့ မသင့်တော်ပါဘူး။
မြေပဲဆီမှာဆိုရင် မပြည့်ဝဆီ 50% ပါဝင်ပေမယ့် ပြည့်ဝဆီကလည်း 30% ပါဝင်နေပါတယ်။ နှမ်းဆီ မပြည့်ဝဆီ များစွာ ပါဝင်ပေမယ့် ပြည့်ဝဆီပါဝင်မှုက တော်တော်လေး နည်းပါတယ်။ စာအုန်းဆီမှာတော့ မပြည့်ဝဆီ 85% အထိပါဝင်နေပြီး ပြည့်ဝဆီပါဝင်မှုက တော်တော်လေး နည်းပါတယ်။ အသုံးများတဲ့ ဒီဆီသုံးမျိုးမှာဆိုရင် ပဲဆီက စားအုန်းဆီထက် ရွေးချယ်သင့်တဲ့ဆီတစ်မျိုးဆိုရင် မမှားပေမယ့် နှမ်းဆီလောက်တော့ ကျန်းမာရေးနဲ့ မညီညွတ်ပြန်ပါဘူး။
နောက်ပိုင်း မီးဖိုချောင်တွေမှာ နေရာယူလာတဲ့ ဟင်းချက်ဆီတွေဖြစ်တဲ့ ပဲပိစပ်ဆီနဲ့ နေကြာဆီမှာဆိုရင် ပဲပိစပ်ဆီမှာ မပြည့်ဝဆီ 60% ပါဝင်နေပြီး ပြည့်ဝဆီကလည်း 23% ပါဝင်နေပါတယ်။ ဒီပမာဏက ပဲဆီထက်တောင် ပြည့်ဝဆီ ပါဝင်မှု များနေပါတယ်။ နေကြာဆီ မပြည့်ဝဆီ ပမာဏ ပြည့်ပြည့်ဝဝ ပါဝင်နေပြီး ပြည့်ဝဆီ ပါဝင်မှုက အတော်လေး နည်းပါတယ်။ သူ့ရဲ့ အားသာချက်က ဗီတာမင် အီး ပါဝင်နေတာပါ။
ဒါကြောင့် ကျန်းမာရေးနဲ့ ညီညွတ်တဲ့ ဟင်းချက်ဆီဆိုရင် နှမ်းဆီနဲ့ နေကြာဆီက အကောင်းဆုံးပါ။
ဆီစားလို့ အစားမဖြစ်ပါဘူး
ဟင်းချက်ဆီက ကျန်းမာရေးနဲ့ ညီညွတ်တယ်ဆိုတိုင်းလည်း အများကြီး စားလို့ မဖြစ်ပါဘူး။ ဆီကို လက်ကြားယို ရွှဲနစ်နေအောင် စားတာက ကိုယ့်ကိုယ်ကိုယ် ထိခိုက်အောင် လုပ်နေတာပါပဲ။ ဒါကြောင့် ဆီကို ထိုက်သင့်သလောက်ပဲ စားပေးပါ။ ခဲတဲ့ဆီတွေ၊ အရောင်ညစ်တဲ့ ဆီတွေ၊ ပြန်ကြော်ဆီတွေ၊ တိရစ္ဆာန်က ရတဲ့ အဆီတွေကို မစားပါနဲ့။
ရေးသားသူ - မွန်မွန်