လေ့ကျင့်ခန်းလုပ်ခြင်းနှင့် ကယ်လိုရီလောင်ကျွမ်းမှု
ကယ်လိုရီဆိုတာ တကယ်တော့ လုံးဝမကောင်းတာချည်းပဲ မဟုတ်ပါဘူး။ ကျွန်တော်တို့ ခန္ဓာကိုယ်က ပုံမှန်လုပ်ငန်းဆောင်တာတွေကို ကောင်းကောင်းလုပ်ဆောင်နိုင်ဖို့၊ အားအင်ပြည့်နေဖို့ ကယ်လိုရီပမာဏ အတိုင်းအတာတစ်ခုအထိ လိုအပ်ပါတယ်။ ဒါပေမယ့် နည်းလွန်းရင်လည်း မကောင်းသလို၊ များလွန်းရင်လည်း မကောင်းတဲ့အတွက် ကယ်လိုရီတွေ ရရှိမှုက ခန္ဓာကိုယ်လိုအပ်တာထက် ပိုများလာရင်တော့ ဘေးထွက်ဆိုးကျိုးအနေနဲ့ ကျန်းမာရေးကို ထိခိုက်စေနိုင်ပါတယ်။ ဒီအတွက် ကယ်လိုရီကို အသုံးချရင်း လေ့ကျင့်ခန်းလုပ်ပြီး ကယ်လိုရီကို လောင်ကျွမ်းစေရပါတယ်။
လေ့ကျင့်ခန်းနဲ့ ကယ်လိုရီလောင်ကျွမ်းမှု ဆက်စပ်ပုံ
လေ့ကျင့်ခန်းလုပ်တဲ့အခါ ကြွက်သားထဲမှာရှိတဲ့ ဆဲလ်တွေနဲ့ ကြွက်သားမျှင်တွေဟာ မော်လီကျူးတွေကို ဖြိုခွဲပြီး အားအင်တွေ ထွက်လာစေပါတယ်။ ဒီအားအင်တွေဟာ လေ့ကျင့်ခန်းလုပ်နေတဲ့ ကြွက်သားတွေကို အားဖြစ်စေပြီး အလေးဒဏ်ကို ပိုခံနိုင်ရည်ရှိအောင် ကူညီပေးပါတယ်။ ဒီအားအင်တွေကို ကယ်လိုရီပမာဏနဲ့ တိုင်းတာပါတယ်။ လေ့ကျင့်ခန်းလုပ်နေတဲ့အခါ ရှိပြီးသား ကယ်လိုရီကနေ ဒီလေ့ကျင့်ခန်းအတွက် အားအင်ဖြစ်စေသလို၊ ပိုလျှံနေတဲ့ ကယ်လိုရီတွေကိုလည်း ထပ်မံလောင်ကျွမ်းအောင် အသုံးချပါတယ်။
လေ့ကျင့်ခန်းလုပ်မှ ကယ်လိုရီလောင်တာတော့ မဟုတ်ပါဘူး။ အသက်ရှူတာ၊ ခန္ဓာကိုယ်တွင်း အင်္ဂါတွေ အလုပ်လုပ်နေတာ၊ အစာချေဖျက်နေတာ၊ ဆဲလ်တွေကို ပြန်ပြုပြင်ပေးနေတာ၊ အနားယူနေတဲ့အချိန်မှာတောင် ခန္ဓာကိုယ်က ကယ်လိုရီတွေကို လောင်ကျွမ်းပေးနေပါတယ်။ ဒါပေမယ့် ကိုယ်တွင်းအပူနည်းသလို၊ ဒီကယ်လိုရီတွေကို အသုံးချမှုနည်းတာကြောင့် လေ့ကျင့်ခန်းလုပ်တာလောက်တော့ ကယ်လိုရီပမာဏများများ လောင်ကျွမ်းစေမှာ မဟုတ်ပါဘူး။
အစာစားခြင်းနဲ့ ကယ်လိုရီလောင်ကျွမ်းမှု ဆက်စပ်ပုံ
စားလိုက်တဲ့ အစားအစာတွေကို ချေဖျက်ဖို့ ခန္ဓာကိုယ်က အလုပ်လုပ်ရတဲ့အခါ ရှိပြီးသား ကယ်လိုရီတွေကို အသုံးချရပါတယ်။ ဒီအစားအစာတွေကို ချေဖျက်ပြီး သူ့ထဲက အာဟာရတစ်ဝက်လောက်ကို အသုံးချဖို့ အားအင်အနေနဲ့ ပြောင်းလဲပစ်လိုက်ပါတယ်။ အထူးသဖြင့် ပရိုတင်းဓာတ်၊ အဆီဓာတ်နဲ့ ကစီဓာတ်ကြွယ်ဝတဲ့ အစားအစာတွေကနေ အစာချေစနစ်အတွက် လိုအပ်တဲ့ အင်ဇိုင်းတွေအဖြစ် ဖြိုခွဲပေးပြီး အနားယူနေတဲ့အချိန်မှာ စုပ်ယူလိုက်တဲ့ အာဟာရတချို့ကို ခန္ဓာကိုယ်က သိုလှောင်လိုက်ပါတယ်။ သိုလှောင်ထားတဲ့ အားအင်တွေ (ကယ်လိုရီ) တွေကို လေ့ကျင့်ခန်းလုပ်ရမှာ ပြန်အသုံးချရင်း လောင်ကျွမ်းစေပါတယ်။
ဒီတော့ ကျွန်တော်တို့ တစ်နေ့တာမှာ ဘာတွေစားသောက်လဲ၊ လေ့ကျင့်ခန်းမလုပ်ခင်မှာ ဘာတွေစားလိုက်လဲဆိုတာပေါ် မူတည်ပြီး လေ့ကျင့်ခန်းလုပ်တဲ့အခါ အားအင်ပိုသုံးရနိုင်ပါတယ်။ ဘာကြောင့်လဲဆိုတော့ ခန္ဓာကိုယ်ထဲမှာ အဆီဓာတ်ဆဲလ်တွေ စုပြုံနေလို့ပါပဲ။ ဒီအဆီဓာတ်တွေကို ဖြိုခွဲပြီး ခန္ဓာကိုယ်က ပိုအလုပ်လုပ်ရသလို၊ လေ့ကျင့်ခန်းလုပ်ဖို့အတွက်လည်း အားအင်လိုအပ်တာကြောင့် ကယ်လိုရီများများရှိမှ အဆင်ပြေပါတယ်။
လေ့ကျင့်ခန်းလုပ်တဲ့အခါ ကယ်လိုရီဘယ်လောက် လောင်ကျွမ်းလဲဆိုတာကိုတော့ အတိအကျသတ်မှတ်ထားတာမျိုး မရှိပါဘူး။ ဘာကြောင့်လဲဆိုတော့
· ခန္ဓာကိုယ်အချိုးအစား မတူညီလို့
· ခန္ဓာကိုယ်ရဲ့ ကယ်လိုရီလောင်ကျွမ်းနှုန်း မတူညီလို့
· တစ်နေ့တာမှာ စားသောက်နေထိုင်မှုပုံစံ ကွဲပြားလို့
· ကျန်းမာရေးအခြေအနေ မတူညီလို့
· လေ့ကျင့်ခန်းလုပ်တဲ့အခါ စိုက်ထုတ်လိုက်တဲ့ အားအင်ပမာဏ မတူညီလို့ပါပဲ။
အကယ်လို့ နေ့တိုင်း Gym သွားပြီး လေ့ကျင့်ခန်းလုပ်မယ်ဆိုရင် အနည်းဆုံး ကယ်လိုရီ ၂၀၀-၃၀၀ ကြား လောင်ကျွမ်းနိုင်ပါတယ်။ လူတစ်ယောက်ဟာ ကိုယ်အလေးချိန်တစ်ပေါင်ကျဖို့ အနည်းဆုံး ကယ်လိုရီ ၃၅၀၀ လောင်ကျွမ်းဖို့ လိုအပ်ပါတယ်။ ကိုယ့်ရဲ့ ကယ်လိုရီလောင်ကျွမ်းနှုန်းကို မြှင့်တင်ဖို့ဆိုရင်
၁။ လေ့ကျင့်ခန်းလုပ်တဲ့အခါ ကြားထဲမှာ အနားယူချိန်မကြာပါစေနဲ့။ သွေးပူနေတုန်းမှာ အပြင်းအထန်လေ့ကျင့်ခန်းလုပ်ပြီး ချွေးထွက်လိုက်တယ်ဆိုရင် ခန္ဓာကိုယ်ရဲ့ ကယ်လိုရီလောင်ကျွမ်းနှုန်း ပိုမြန်စေပါတယ်။
၂။ တစ်နေ့တာမှာ စားသောက်နေထိုင်မှုပုံစံကို ကျန်းမာတဲ့အနေအထား ရောက်အောင် ဂရုစိုက်ပေးပါ။
၃။ အစာစားပြီဆိုရင် ပမာဏနည်းနည်းနဲ့ အကြိမ်ရေများများ စားတဲ့အကျင့်ကို လိုက်နာပါ။
၄။ တစ်နေ့တာမှာ တောက်လျှောက်ထိုင်တာမျိုး မလုပ်ဘဲ ကိုယ်လက်လှုပ်ရှားမှုအသေးစား လုပ်ပေးတာ၊ လမ်းများများလျှောက်တာမျိုး လုပ်ပေးပါ။
၅။ ဝါသနာပါရာ အားကစားတစ်ခုခုကိုပါ လိုက်နာပါ။
၆။ အိမ်မှာရှိတဲ့အချိန် တောက်လျှောက်ထိုင်၊ လှဲနေတာမျိုးထက် အိမ်အလုပ်တွေကို ဝိုင်းကူလုပ်ပေးပါ။
၇။ ချွေးများများထွက်လေ၊ ကယ်လိုရီလောင်ကျွမ်းမှုနှုန်း ပိုကောင်းလေဆိုတာ မမေ့ပါနဲ့။
ရေးသားသူ - ရဲမျိုးမြတ်