ကိုယ်ဝန်ဆောင်ချိန်မှာ အဝလွန်တာ မဖြစ်စေဖို့
ကိုယ်ဝန်ဆောင်ချိန်မှာ အမျိုးသမီး ၃၂ % လောက်ကပဲ ကျန်းမာတဲ့ အတိုင်းအတာအတွင်း ကိုယ်အလေးချိန် တက်တာကို ရရှိတာပါ။ ကိုယ်ဝန်ဆောင် အမျိုးသမီး ၄၈ ရာခိုင်နှုန်းလောက်က ရှိသင့်တဲ့ ကိုယ်အလေးချိန် အတိုင်းအတာထက် ကျော်လွန်ပြီး ကိုယ်အလေးချိန် တက်လာတတ်ကြပါတယ်။
ဒီလိုမျိုး ကျန်းမာတဲ့ အတိုင်းအတာကို ကျော်လွန်ပြီး ကိုယ်အလေးချိန် တက်လာတဲ့ အမျိုးသမီးတွေက ကိုယ်ဝန်ဆောင် ကာလ နောက်ဆက်တွဲ ကျန်းမာရေး ပြဿနာတွေ ဖြစ်ကြတဲ့ ကိုယ်ဝန်ဆောင်သွေးတိုး၊ ကိုယ်ဝန်ဆောင်ဆီးချို၊ ကိုယ်ဝန်ဆိပ်တက်တာ၊ လမစေ့ဘဲ ကလေးမွေးဖွားတာ၊ ကလေးမွေးဖွားရခက်တာ၊ ကလေးက ထွားလွန်းတာ၊ အိပ်နေစဉ် ဟောက်ရင်း အသက်ရှူရပ်တာ၊ ခွဲမွေးရတာ၊ နောက်ထပ် ကိုယ်ဝန်ဆောင်ချိန်မှာ အဝလွန်နေတာ၊ ကလေးက အဝလွန်တာတွေကို ခံစားရနိုင်ပါတယ်။
ကိုယ်ဝန်ဆောင်ချိန်မှာ အဝလွန်တာ မဖြစ်စေဖို့
အချို့သော အမျိုးသမီးတွေက ကိုယ်ဝန်မဆောင်ခင်ကတည်းက အဝလွန်နေကြတာ ဖြစ်ပြီး အချို့အမျိုးသမီး တွေကတော့ ကိုယ်ဝန်ဆောင်ချိန်မှာ လျင်လျင်မြန်မြန် ဝိတ်တက်လာရင်းက အဝလွန်သွားကြတာပါ။ ကိုယ်ဝန်ဆောင်ချိန်မှာ အဝလွန်တာက ကျန်းမာရေး ထိခိုက်စေတယ်ဆိုပေမယ့် ကိုယ်ဝန်ဆောင်တွေအနေနဲ့ ဝိတ်ချတာ၊ Diet စားတာမျိုးတွေ လုပ်ဆောင်လို့ မရပါဘူး။
ဒါကြောင့် ကိုယ်ဝန်ဆောင်ချိန်မှာ အဝမလွန်စေဖို့ လုပ်ဆောင်နိုင်မယ့် အကောင်းဆုံးသောနည်းလမ်းက အာဟာရညီညွတ်မျှတအောင် စားသုံးပြီး လှုပ်လှုပ်ရှားရှား နေဖို့ပါ။ ကိုယ်ဝန်ဆောင်ချိန်မှာ လုံလောက်တဲ့ ကိုယ်အလေးချိန် တိုးတက်မှု မရှိဘူးဆိုရင် မိခင်ရော ရင်သွေးလေးမှာပါ ကျန်းမာရေး ပြဿနာတွေ ရှိလာနိုင်ပါတယ်။
ဒီတော့ ကိုယ်ဝန်ဆောင်ချိန်မှာ အဝမလွန်စေဘဲ သင့်တင့်တဲ့ ကိုယ်အလေးချိန် တိုးစေဖို့ဆိုရင်
အာဟာရ သင့်တင့်မျှတအောင် စားပါ
နေ့စဉ် စားသုံးမှုမှာ သစ်သီးတွေ၊ ဟင်းသီးဟင်းရွက်တွေ ပါဝင်အောင် စားသုံးပေးပါ။ ဗီတာမင် ပြည့်ဝပြီး ကစီဓာတ် နဲ့ အဆီဓာတ် ပါဝင်မှု နည်းတာကို စားပေးပါ။ ပေါင်မုန့်စားပေးပါ။ ခရက်ကာ၊ ဆီရီယယ်စတာတွေကို စားပေးပါ။
အဆီနည်းတဲ့ နို့ထွက်ပစ္စည်းတွေကို ရွေးချယ် စားသုံးပါ။ ကိုယ်ဝန်ဆောင်ချိန်မှာ တစ်နေ့တာကို နို့နဲ့ နို့ထွက်ပစ္စည်း ၄ ကြိမ်လောက် စားသုံးဖို့ လိုပါမယ်။ အဆီထုတ်နို့ သောက်ပေးပါ။ အဆီထုတ် ချိစ်၊ ဒိန်ချဉ်စတာတွေကို စားပေးပါ။
ရှောင်ရမယ့် အစားအစာတွေ ရှိပါတယ်
သဘာဝ အချိုကိုပဲ စားပေးပါ။ သကြားတွေ ပြုပြင်ထားတဲ့ အချိုတွေကို မစားပါနဲ့၊ အချိုများတာ ကယ်လ်လိုရီများတာတွေကို ရှောင်ရပါတယ်။
ချိုတဲ့ သောက်စရာတွေမှာ ကစီဓာတ် ပါဝင်မှု များတာကြောင့် မဝယ်ယူချင်မှာ အညွှန်းကို သေချာဖတ်ပါ။ သောက်ရေကို အချိုရည်အစား သောက်ပေးပါ။
အသင့်စား အစားအစာတွေ၊ အာလူးကြော်၊ သကြားလုံး၊ ကိတ်၊ ကွတ်ကီး၊ ရေခဲမုန့် စတာတွေကို ရှောင်ပါ။ ပြုပြင်ထားတဲ့ အစားအစာတွေကို ရှောင်ပေးပါ။ အမြန်စား အစားအစာတွေ ရှောင်ပါ။ အဆီနည်းတဲ့ အစားအစာတွေကိုပဲ ရွေးချယ်စားသုံးပါ။
အိမ်ချက် အစားအစာတွေ စားပါ
ဆီကြော်စာတွေ၊ အဆီများတဲ့ အပြင်စာတွေ အစား ဆီနည်းနည်းနဲ့ ဆားနည်းနည်းလောက်ပဲ ထည့်ပြီး ချက်ပြုတ်ပြင်ဆင်ထားတဲ့ အိမ်ချက် အစားအစာတွေကိုပဲ စားပေးပါ။ ဆီကြော်စာတွေ ရှောင်ရပါမယ်။ ဆီတွ ထောပတ်တွေ သုံးပြီး ကြော်ထားတာတွေကို ရှောင်ရပါမယ်။
လေ့ကျင့်ခန်း လုပ်ပါ
ဆရာဝန်နဲ့တိုင်ပင်ပြီး သင့်တင့်တဲ့ ကိုယ်လက်လေ့ကျင့်ခန်းတွေ လုပ်ဆောင်တာက ကိုယ်ဝန်ဆောင်ချိန် အဝလွန်တာကို သက်သာစေနိုင်ပါတယ်။ ခန္ဓာကိုယ်က ကယ်လ်လိုရီ အပိုတွေ လောင်ကျွမ်းစေဖို့အတွက် ယောဂလေ့ကျင့်တာ၊ သင့်တင့်တဲ့ လေ့ကျင့်ခန်း လုပ်တာမျိုးတွေ လုပ်ဆောင်ပေးပါ။ ရေကူးတာကလည်း နည်းလမ်းကောင်း တစ်ရပ်ပါ။
အခုပြောခဲ့တဲ့ နည်းလမ်းတွေက ကိုယ်ဝန်ဆောင်မေမေ အဝလွန်တာ မဖြစ်အောင် ကာကွယ်ပေးနိုင်မှာပါ။
မွန်မွန်